ماحنت الروح لغير ملكاج
ولا حن الدليل الغيرج ولان
كضا زغري وصباي اتصابح وياج
وتصابح كمت عكبج بالاحزان
سفينه بغير واهسهه بلياج
تضل وحشة سفر بعيون سفان
ما حنيت لارض الوطن لولاج
يلن ما عاش بالدم غيرج انسان
الي نزعة وفه تهوف اعله طرواج
والي بحبج طفح بالشوك وجدان
جنت نجمه والوحا دوم بسماج
غبت عنج ونوحج صار ديدان
يمه جنت فرحه التطير بروض دنياج
يلبلياج طير بغير جنحان
حضنج جان عشي ومكدر انساج
اروح العب ورد اعليه لهفان
حنان الناس يمه شحده يدناج
شبه ونتي حنانج ذهب معدان
يمض بيج البرد يايمه بشتاج
ونه الدافي اعله صدرج نوم شبعان
انه اتغطى بحنانج والسمه غطاج
وتسهرين ليلج حد الاوذان
نص الليل احسهه تجسني يمناج
تفكديني اعله كيفج خاف بردان
ما جازيت تعبج ذاكه ورباج
شوفيلج وقابل ذاكه الاحسان
نهر يم البحر شفت الوفه وياج
وشيساوي البحور بوفه النهران
تهل دمع الحنين بدربي عيناج
نحل جسمج عليه وصار عضمان
ياهو الي تعب دور على ادواج
لمن كال الدرب حتى انه تعبان
علينه بالمرض تنسمع شكواج
وياما بات جفنج النه سهران
يماي انتي بحياتي ودهري بداج
شيلمج بعد بجفوف عطشان
يلحنينه بعد جا وين انه الكاج
وياهو يفرفح الملكاي فرحان
لضل يايمه اون الليل بجفاج
وضل عايش حياتي خلافج احزان
انه التايه ييمه بليل فركاج
وانه خلافج ييمه بغير عنوان
تحيــاتي للجميـــع
مـــايسترو الـــحب
