اصدقائي الغالين تدرون شنو الشي اللي
يتمناه كل عراقي متغرب عن وطنه العراق
هسه الساعه بالوحده ونص بليل ، اجت الوطنية ابالك مااعرف شنو اللي اجا ، تكولون باب الجنة اتنور عندي
تعرفون شنو اللي دااتمناه ، دااتمنى انو هذا الوضع اللي صاير بالعراق عباره عن حلم ، اتمنى كل يوم لمن اكعد الصبح انه كل هلوضع عبارة عن حلم ، اتمنى اكوم الصبح افتح التلفزون الكي السلام الجمهوري وبعده تلاوة من القرآن الكريم ووراها افلام كارتون بكل براءة ، اتمنى اطلع بالشارع الكا الناس طبيعيه امشي اروح وارجع مااحد يكلي وين رايح وشعندك رايح ووين ومنين و و و ، اتمنى اطلع الصبح بالسياره وماكو شوارع مسدسده ولا صبات ولا مفارز ، اتمنى اطلع بالشارع وماكو اصوات صفير سيارات فرق الموت وغيرها ، اتمنى اطلع بالشارع واعبر من على فوق جسر الجادريه والقي السلام على نهر دجله مثل ما كنت اسوي يوميه ، احس عندي فد واجب لازم اسويه وهو القاء التحيه على دجله ، واذا عندي وقت اوكف وانزل فد ربع ساعه على الجسر اتسامر ويه دجله حبيبي ، اتمنى ماكو بجيبي موبايل حتى لا احد يخابرني ويطمن عليّ ، اتمنى ماكو ستلايت اتمنى ماكو انترنت بهذه السهوله ، اتمنى ماكو كيلو موز بالف دينار ولا قوطيه ببسي بخمسمية دينار ، اتمنى ماكو رقم مينفيست ، اتمنى ماكو مصطلح حواسم ، اتمنى ما ينشغل فكري بتنكة النفط اللي سعرها عشرين الف دينار ولا قنينة الغاز اللي سعرها عشرين الف دينار ولا تفويلة السيارة اللي هي بثلاثين الف دينار ولا سعر امبير المولده اللي هو بثنعش الف دينار ، اتمنى من اريد اطب اغسل مااخلي بالي بالماي شوكت يسخن واخاف لا يخلص او بعده بردان ، من خرب بهلعيشة ، اتمنى ان اطلع واسافر خارج العراق وانا مرفوع الراس اطب لعمان واسافر وين مااريد ماعدا اسرائيل ومااحد يشمر الجواز بوجهي ويكلي امشششششششي من هون انت عراكي ، لكم يايااااااااااابا يايااااااااااااابا اذا اني هيجي داافكر لعد العراق لو عنده لسان جان شكال جان شحجا ، انت يا دجله شصاير بيك يوميه شامرين جثة من ابنائك بيك ، شوارع بغداد العظيمه عباره عن مزابل وجثث بدماء ، اتمنى ان ان اعبر من فوق المعلق ( ففوق المعلق كنا نلتقي ) واشوف علم العراق يرفرف نظيفاً براية *الله* اكبر*
فقط هذا ما تبقى من العراق ، فقط راية الله اكبر في علم العراق
فالعراقي ( اقصد العراقي الاصيل ) وهو ذي الاقلية الساحقة في العراق ليس موجودا في هذا يومنا ، لانه هرب من الموت الى خارج البلاد ، او اختبئ في منزله من الكلاب الغير اوفياء ، او مدفون تحت التراب
لك الله يا عراق ، وعليكم الله يا انجاس البلاد ... يا غرباء
والحمد لله على اي حال
فأي حال هذا الحال
لا اله الا الله
الله يرحم بحالنا
تحياتي